USA!

Sodeli, mir sind nach 10 Stund flüüge wider Dihei ahcho. Hät nöd so viel cooli Film gha wie im Abeweg. Aber mir händs doch irgendwie überstande.

Ah, isch das schön mal wider ide eigne Duschi di Hei z'dusche!!! *herrlich* Und Zabig wider im eigne Bettli schlafe!!! *yeah*

Jez hani grad alli Pix vom Netbook ufe PC übere kopiert.
--> 3'780 Fötteli hämer total... das gaht ja na! :-)

Morn gahts wider is Büro... müend ja irgendwie Gäld verdiene für di nächschte Ferie! *hihi*

Danke allne für's Blog verfolge.

Kiss

Dane & Beat

Hüt simer nachli an Beach... Malibu, Santa Monica und dänn dä berüehmt Venice Beach! Isch mega cool gsi ufem Boardwalk z'laufe und lädele und all die schrääge Lüüt ahluege. Eis Lädeli nachem andere... paar Künschtler händ Sache verchauft, Läde mit Shirts, Sunnebrülle, Bikini, Bongs usw. Dänn hät's immer wider Schwarzi gha wo eim händ wele e CD verchaufe... die händ glaubs s'Gfühl, sie chömed so mal gross use.

Zabig simmer as Football-Spiel vode L.A. Dodgers gäge d'Giants vo Frisco. Isch mega cool gsi, das mal so live z'erläbe! Die Amis sind scho nöd ganz butzt.... chuum lauft chli Musig oder trümmelet öper, singed alli mit! :-) Dänn natürlich na ufstah für d'National-Hymmne....


d'Dodgers händ gunne und alli händ Froid gha! :) Nur mir händ d'Regle immer nanig tschegget... *grins*

Dänn häts na es mega fetts Füürwerch geh! Isch ebe jez s'Labor Day Weekend!
 

Zabig nachem Spiel simmer na de Hollywood Boulevard ga abchecke. All die viele Sterne am Bode.... en Teil vode Lüüt kännt mer ja gar nöd!? hmmmm

Zum Abschluss vo hüt Abig simer na bim Grauman's Chinese Theatre ga luege. Das isch deet wo alli d'Füess- und Händabdrück im Bode verewiget händ. Deet hät's scho eher "gueti" Näme gha wie: Bruce Willys, Matt Damon, Harry Potters, Arnold Schwarzenegger, Will Smith usw.

Jez isch Morge am halbi drü und mir müend mal ändlich is Bett... :-)

Morn isch nachli L.A. ahgseit und am Nami flüüged mir ja leider scho wider heiwärts...

Hüt simer de ganz Tag ide Universal Studios z'Hollywood gsi! Es isch eifach genial gsi und mer isch total inere andere Wält.

Mir händ en Front of Line Pass kauft und händ somit überall chöne näb de Schlange dure laufe und bide Shows hämer Premium-Seat's gha. Das isch aso rächt sexy gsi!!! ;-)

De Beat isch zum Uftakt grad mal husch uf de Simpson Ride... hät ebe na wenig Lüüt gha so am Morge. Das isch mir z'fescht Rollercoaster-mässig, drum han ich mir na es "Zmorge" vom Cinnabon gönnt *mjamm*

Dänn simmer beid uf's Jurrasic Park Schiffli. Isch cool gsi, sone easy Fahrt dur Dino-Landschafte, überall häts grüücht und sind Dinos ume gsi. Aber plötzlich isches s'Loch uf gange und ich han dänkt "oh oh".... 
*knall, tätsch, ratter.... uuuuooooooohhhhh! SPLASSSSHHHHHH*
Simer mal so gschwind 25 Meter s'Loch ab kesslet und une is Wasser tätscht.
So hämer nachher usgseh... :-) geile Uftakt gsi! *hihi*
 ... nass isch nur de Vorname! ...

Dänn hämer's rächt guet troffe mit all dene Ziite vode Vorstellige. Shrek & Terminator in 4D, House of Horror Geischterbahn, Special Effects Show usw.!


Dänn simer uf d'Mummy-Bahn. Ich han dänkt, das isch au sones Bähndli wo chli dure fahrt und dänn verschrecked eim Mumie und so Zügs. Aber eigentlich hätti bim Bügel wo zwüsche de Bei ufe chunnt söle stutzig werde... Isch so los gange wie erwartet, Mumie deet, Mumie da... chli Rauch, Gschrei und so. Dänn hät mer die viele Skorpion & Chäfer gseh us de Löcher seckle & im gliiche Momänt häts une bide Füess im Bähndli Luft use blaset. Das isch u-huere ächt gsi, shit bin ich verschocke! Dänn isches ufe gange und voll Achterbahn-mässig im Zügs ume gfätzt. Es isch aber gange, wills ja fürschi gfahre isch. De Scheiss isch nur gsi, dass voll dunkel gsi isch. Han mich mega gfreut, dass ich das so guet verträge und han sogar chli Spass debii gha. Dänn gits en Ruck und s'Bähndli haltet ah.... und zägg, fätzt die scheiss Bahn hinderschi namal dur's Zügs dure! Oh mein Gott!!! Han mich eigentlich scho gseh chotze.. aber es isch dänn gange, wills zum Glück nöd lang hinderschi gange isch. Ich han's überläbt und es isch mir nachher nöd mal schlächt gsi! *yessss*

Dänn hät mal öpis Zmittag ane müse... ich bin scho fascht am verhungere gs! *grins* Dänn hämer dänkt, mir mached d'Studio-tour... die isch ja easy.. chli ga d'Filmsets ahluege zum Verdaue.
Isch mega lässig gsi, die Sets mal so vo Nöchem ahz'luege. Dänn simmer mit eusem Zügli ine Art Garage ine gfahre, dänn isches dunkel wurde und eus sind 3D-Dinos um d'Ohre gfloge, es hät gschüttlet, grüttlet, gwindet.... "what a feeling"! Isch mega gsi, würklich wie z'mitzt drin. So isches dänn wiiter gange... überall hät's wider chli Special Effects geh.

@Nädi: Mir händ leider nöd chöne id Wisteria Lane vo Desperates ine fahre, wills grad am dreihe gsi sind.... d'Schauspiel hämer au nöd gseh :-(

 

Zum Znacht simer im Hard Rock Cafe ga ässe... feini Fajitas häts geh!
 *mjammm*

So, mir müend mal is Bett...sind wider viel gloffe hüt! *gähn*

Hüt simer na s'letschte Stückli richtig L.A. gfahre mit eusem Autööli. Isch cool gsi chli ade Küschte nah, leider häts wider so viel Näbel gha... aber je meh abe richtig L.A. je besser isches wurde. Da isch wider voll Sunne, heiss und alles supi! :-)

Ja, mir händ e rächti Route ane gleit i dene 3 Wuche... total sinds öpe 5'000Km gsi! Wäner obe uf "Weltkarte" klicked, gsänd Ihr womer überall gsi sind.


Hüt Mittag hämer wider mal i eusem geliebte Taco Bell gässe! *mjammi*  ...sone 5$ Box mit verschiedne Sache drin!

Aber d'Hiiwiis uf de Verpackig sind mal wider typisch Ami :-)
Das isch nur sone Pizza-Schachtle mässigi Box gsi! 


Euses Hoterl da isch in West Hollywood. Grad nöch bim Hollywood Boulevard und bide Universal Studios. Mir händ e mega Suite mit ere riese Stube, Balköndli, Chuchi usw.

Gäge Abig simer grad husch zude Universal Studios gfahre chli ga luege bim Citywalk. Deet hämer au grad fein Znacht gässe und chli gluegt, was mir morn ide Studios alles wänd gseh. Wird geil morn, ich freu mi meeeega!!!
 

Mir händ für de FR Abig Tickets kauft für es Baseball-Spiel! Das wird sicher luschtig, mir wo kei Ahnig händ vode Regle!? Aber mir ässed dänn Hot Dogs und schreied chli mit de anderen Fans ume, dänn falled mir sicher nöd so uf.

So, mir müend is Bett.... morn müemer früeh uf! *Guet Nacht*

Hüt simer am Morge z'Frisco na zude Twin Peaks ufe. Deet hät mer e mega Ussicht über ganz San Francisco! Mir händ Glück gha und de Näbel isch eher bide Brugg äne gsi. d'Stadt hät vo deet obe mega usgseh....
 

Dänn simer na husch ad Haight Street ga en Stopp risse. Das isch deet wo d'Hippies ume ghanget sind. Es hät mega lässigi Lädeli, alli Farbe und rächt schräägi Lüüt uf de Strass :-) Eine isch uf siim BMX voreme Schaufänster ghocket und mir sind scho bim Verbiilaufe stei däne gsi.. kei Ahnig, was dä i siim Joint ine gha hät! *grins*

Dänn simmer ufem Highway 1 de Küschte nah gfahre. Es hät cooli chliini Örtli ufem Weg gha aber nur mit paar Ihwohner. Es paar Käffer sind au voll gsi mit Fälder volle Artischocke, Erdbeeri und suschtigem Gmües. Es hät jenschti Arbeiter ufem Fäld gha wo gschaffet händ. Immer wider häts mega Näbel-Schwade überem Meer und eusere Strass gha. Hät usgseh, als wäre mir scho im Flüger überem Näbelmeer.
 

Dänn simmer na ame coole Kiter-Beach verbii cho. Die Jungs händs rächt im Griff gha und gwindet häts wie d'Schissi! Aber mir händ ja guete Haarspray... hihi


Jez simer in Paso Robles.. isch alles volle Rebberge und überall hät's Wiiguet womer chan ga degustiere! Sind im Marriott ade Hotelbar und blogged eis für Eu Dihei. :-)

Morn gaht's wiiter uf L.A.!

Guet Nacht und bis morn.

Hüt simer am Morge grad ga Velo miete und richtig Golden Gate Bridge gfahre. Es sind rächti Chrüppel-Bikes gsi aber für die Strecki hät's es tah. Und trampe hät mer au mit dene müse....*keuch*

Mir händ mega Glück gha und d'Brugg isch nöd im Dunscht gsi wie so oft. Es isch im Reisefüehrer gstande, dass mer schnell söll gah, wämer sie guet gseht. Es heig praktisch immer Näbel deet! :)

 

Nachher simer zrugg zum Hotel und händ s'Auto gnah. Dänn simer de SCENIC Drive gfahre. Das isch sone Rundi dur d'Stadt verbii ade wichtigste Pünkt. So hämer en coole Überblick becho vode Stadt. Es isch krass, dass nöd meh Autos unterwägs hät.  Es hät da rächt friedliche Verchehr und nie Stau! Aber mer chan praktisch nie links abbüge...das isch huere müehsam, wämer noime ane wett und nach Pländli fahrt!!!

Bim Westin Hotel isch na en Typ use cho und hät es paarne Fans Autogramm geh, bevor er id Limo ihgstiege isch. Das isch irgend en Spieler vode GIANTS gsi. Hüt isch nämli im AT&T Stadion es Baseball-Spiel.

Dänn simmer natürlich na Cablecar gfahre! :-)


Morn gahts wiiter richtig Los Angeles. Mir halted ide Hälfti aber namal und schlafed deet e Nacht. 9 Stund a eim Tag Autofahre isch eus doch z'viel gsi...

@Mami: Danke viel Mal für's SMS. Isch d'charte vom Bryce dem Fall scho ahch! *freu*
Dänn sötted di andere Charte ja au bald bi Eu allne ihtruddle. Hüt hämer di letschte Charte grad am Pöschtler mitgeh woner de Briefchaschte gleert hät! ;-)

Hüt am Morge simmer mit eusem Chäri dur de Yosemite Park gfätzt. Es isch fascht wie di Hei gsi... oder so Canada-mässig chönnt mer säge. Riese Berge, Wälder und schöni Seeli! Mega idyllisch gsi.


Dänn hämer na e Passfahrt gmacht über de Tioga-Pass (3'031 m.ü.M.)
Deet obe hämer s'erst Mal müse es Jäggli ahlegge.. so höch obe isches doch rächt frisch gsi! *bbbbrrrr*


Nachher isch eusi Fahrt na es rächts Stuck wiiter gange.... uf dem Strecke-Teil häts u-viel Obscht-Bäum gha und so chliini Ständ ade Strass. Chrisi, Öpfel, Pfirsich, Melone... alles hät mer chöne chaufe! *cool*

Dänn simmer na bim Emil's Motel verbii gfahre! *grins*


Schlussendlich simer in Frisco ahcho. Mir sind scho über ne riese Brugg id Stadt ine gfahre. Hät mega cool usgseh... d'Golden Gate hämer gseh, isch aber im Dunscht gsi. Evtl. hämer morn meh Glück!

s'Hotel da isch easy... grad ide Nöchi vode Fisherman's Wharf. Da gaht's voll ab und es hät viel Touris ume und praktisch kei Penners! ;-)

So, jez müemer is Bett.. isch en lange Tag gsi. Morn luege mir, dass mir mitem Velo chönd über d'Golden Gate Bridge fätze! hihi

*guet Nacht*

Hüt nachem Uschecke im Mirage hämer unbedingt na müse das Fötteli ga mache! :-)


Hüt simer wider öpe 5 Stund im Auto gsi am fahre. Das mal durs Death Valley dure. Am Ihgang hämer na es Touri-Pic gmacht.


Dänn hämer na es chliises Lädeli entdeckt bevor dänn lang lang nüt chunnt. Und natürlich de Devils e Charte gschickt! Kei Ahnig, öb die überhaupt ide Schwiiz ahchunnt... :-) Es hät au kei "böösi" Charte gha, nur so Standard. Aber immerhin, ich hans versuecht und evtl. chunnt sie ja würkli ah. Hät dänn hoffentlich au en DEATH VALLEY-Stämpel druf!!! ;-)

Nach de Charte-Schriib-Session isch ebe lang lang nüt cho... Es isch immer wider ufe und abe, Kürvli deet und Kürvli da. Langi Strass, mega heiss und en u-huere Wind!


Jez simer in Mammoth Lakes ahcho und händ es supi geils Hotel verwütscht. Das isch da eigentlich es fetts Skigebiet und mir händ s'Hotel grad diräkt näb de Talstation womer au de Sässeli-Lift gseht. Mir fühled eus grad chli wie di Hei ide CH :)

Na husch gas Städtli abchecke und morn simer in FRISCO! *freu*

YEAH, mir händ hüt namal chöne Vegas gnüsse und erläbe.

Mir händ schön usgschlafe und dänn na es Hotel für di wiiter Reis buecht.

Nachher simer nachli ga shoppe und ihr glaubeds nöd, aber de Beat hät meh poschtet als ich! :-) hihi

Bi eus im Mirage isch ja na de Secret Garden wo di wiisse Tiger vom Sigfried & Roy sind. Mir händ Billet vom Hotel becho und händ die natürlich na müse ga ihlöse. Sind scho mega schöni aber au riiiesigi Büsi! Drü händ na im Pool mitenand gspielt, das isch mega cool gsi zum beobachte.


Zabig simer na s'alte Vegas (Fremont Mall) ga ahluege. Das isch mega ihdrücklich. Die händ en grosse Teil überdacht und en riese Screen is Dach ihbaut.

Live-Konzert händs au na ufere Bühne.. mega cool!

Wider zrugg am Strip hämer bim Bellaggio na zwei Shows gluegt mit de Wasser-Fontäne. Isch scho perfekt mit de Musig abgstimmt! *stuuuun*

Morn müemer früeh uf, dass mir na am Morge dur's Death Valley dure chömed.

Guet Nacht...

Mir händ hüt Morge am halbi zähni mit miim Brüederli und siim Schatz abgmacht. Dänn simer ga s'Zmorge-Buffet im Luxor stürme. Isch mega fein gsi... *mjammm*

Dänn simer hardcore-mässig dur alles dure gloffe und alles ga ahluege. Zwüsche dure hämer immer mal wider es paar Döllers ine Chaschte grüehrt. *grins*


Zmittag hämer ime Tschungel-Reschti gässe. Hät mal wider viel z'grossi Portione geh... Aber fein isches gsi!

Dänn simer wiiter gschlenderet vo Hotel zu Hotel.... Nachere Stärchig mit je eim Liter Bier sind die drü uf de Rollercoaster bim New York New York. Ich bin froh gsi, han ich nöd mit müese... Isch mir bim Zueluege scho schlächt wurde! Uf eusere Siite isch fascht alles mitenand verbunde und mer chan vo Hotel zu Hotel dure laufe. Wämer doch mal husch use muess, stöhnd jenschti Type deet und wänd dir für en Dollar Wasser vertigge. "ice cold Water, one Dollar, Water ice cold!" Aso de Sven häts so guet chöne nahmache, dass er das mal als Feriejob chönnt mache, hämer gfunde! *gröhl* Uf diesere Siite isch das nöd so, isch eher chli di übler Siite. Deet hät's au mega viel so Chärtli-Fritze wo eim Chärtli vo all dene Füdli-Läde wänd ahtrülle.

Das da isch di gröscht Slotmachine womer gseh händ! :) YEAH

Es hät überall so lässigi Läde mit coole Brülle. Halt voll Fasnacht-Style... eifach s'ganze Jahr! *hihi*
 

Ueberall häts so cooli Daiquiris i grosse Bächer wie mirs vo eusne Pubfestivals känned. Aber die Gitarre da im Vordergrund isch de absoluti Hammer! Chasch 3 Liter Sex on the Beach dri fülle lah für 36$ und dänn de ganz Tag mit de Gitarre ume laufe und immer wider trinke! *gröhl*


Hüt simer soooo viel gloffe, eus tuet alles weh!!! *äutsch*


Jez wämer nur na is Bett....*schnarch*